【台語日常】 連續劇報馬仔

文/劉靜娟 |2021.06.11
272觀看次
字級

文/劉靜娟

佇Line頂頭,阮有一个「連續劇報馬仔」的群組。食好鬥相報,看著好看的劇,就報予逐家參考,無管是佗一國的;看了啥感受,也佇遮(這兒)講兩句。

看冊、看戲,一寡好笑的、悲傷的、感動的劇情,有人「共鳴」,加真快樂;袂當共鳴,嘛會當知影別人的觀點,豐富家己思考的角度和闊度。「讀冊會」「影劇欣賞會」就是按呢來的。

阮見面的機會無濟,無辦法面對面討論,也袂當為家己的看法辯輸贏;佇Line頂頭講兩句,有較贏無。

一年來,我連續劇看真濟,和人討論過,自然就知影這个人偏愛的是愛情、偵探、科幻、家庭倫理,抑是笑詼的。知影啥人愛佗一位明星愛甲連伊代言的廣告片都愛看;閣有,A佮意的演員,偏偏是B討厭的。討厭伊的閣真不滿:「一寡好劇竟然攏予伊演,閣配足緣投的男主角!」

我無咧做研究,kan-na(只)淡薄仔了解就感覺真趣味。一个熟似二十外年但是無啥交陪的朋友,因為不時交換對連續劇的看法,伊的個性,才忽然間「立體」起來,互相也有話通講。

一个朋友做囡仔的時愛歌仔戲愛甲想欲綴(tuè,跟)戲班走江湖;佇電視頂看連續劇的歷史嘛有一二十年。問伊佗一齣看過無?竟然絕大部分看過;記性閣足好,會當講明星的來歷、順紲(sūn-suà,順便)分析劇情重點和劇中人物的心情。我講伊,「烏矸仔貯(tè,盛裝)豆油,看袂出;原來是影劇的百科書!」

一日,我佇群組寫:「看劇,談劇,會當了解一个人的個性、興趣、日常生活,甚至伊的美感標準、人生觀等等,這是我的心得。」

阿圓講,「你也加講一寡,予阮閣較了解你。」

我?我早就予in(她們)看透透矣。

熱門新聞
訂閱電子報
台北市 天氣預報   台灣一週天氣預報

《人間福報》是一份多元化的報紙,不單只有報導佛教新聞,乃以推動祥和社會、淨化人心為職志,以關懷人類福祉、追求世界和平為宗旨,堅持新聞的準度與速度、廣度與深度,關懷弱勢族群與公益;強調內容溫馨、健康、益智、環保,不八卦、不加料、不阿諛,希冀藉由優質的內涵,體貼大眾身心靈的需要、關懷地球永續經營、延續宇宙無窮慧命,是一份承擔社會責任的報紙。自許成為「社會的一道光明」的《人間福報》任重而道遠,在秉持創辦人星雲大師「傳播人間善因善緣」的理念之際,更將堅持為社會注入清流,讓福報的發行為人間帶來祥和歡喜,具體實現「人間有福報,福報滿人間」的目標。

App

聯絡我們 隱私權條款

Copyright © 2020 人間福報 www.merit-times.com
All Rights Reserved.