【台語日常】哪毋是拍八折？

文／劉靜娟

去病院做一个無健保的治療，自費八千外箍。納錢的時，少年的櫃檯小姐共我講：「超過八十歲的，減100箍。」

我講：「才優待100箍？哪毋是拍八折？」

伊也笑起來，講：「我嘛想欲按呢，毋過阮爸母來嘛kan-na減100箍。」

我隨去想著一年寫作協會辦活動，送會員一跤會當拖、摺起來也當捾（kuānn，提）的兩用旅行袋。阿圓口才好，是其中一位採購的人。伊講去買的時，老闆講30跤會當算較俗，拍八折。阿圓講：「按呢40跤會當拍七折無？」

可能罕得有人買40跤，講來講去，老闆講：「好啦，生理歹做，算恁七折，後擺恁著愛介紹人來共我買。」

阿圓真敢，紲落去講：「按呢阮若買50跤，就應當拍六折。」

「恁是按算欲買幾跤？」

「60跤。」

老闆強欲變面，講：「生理予你做啦，照你的算法，我若賣100跤，是毋是著愛貼錢予人客？」

我烏白想：啊佇病院，80歲的拍八折，90歲的拍九折，顛倒較貴；100歲的拍十折，就是愛付全額啦！

當初彼跤會當拖、也當捾的旅行袋，我提來做菜籃仔車，毋過伊袂接力（tsih-laa̍t，承重），歹拖，有人佮意，我趕緊送出去；顛倒阿圓和人出價彼个過程，我留佇心肝內，想著就愛笑。