【台語日常】想欲送伊墨盤

THE MERIT TIMES

文／劉靜娟 2023-11-23

字級

收藏文章

0
支持請+1

24觀看次

文／劉靜娟

想欲送Y一个有紀念性的禮物，毋過，毋知啥物較適合。

聽講伊有咧寫毛筆字，想講送一套墨盤、墨和印色，應當實用，也較有氣質。

先拍電話打探伊寫大字的狀況。

伊講幾年來，一禮拜去上一節課，隷、篆，楷攏學過。我講按呢一定程度袂䆀＊矣，伊講無啦，無認真，時常欲上課彼工才趕緊寫；而且，「干焦＊寫老師現場示範彼幾字。」我初初上書法課的時也是按呢。

「寫心適的，毋捌寫對開的，免講全開的。」聽起來有影無認真。我上書法課的時，有人不時交全開的作業，閣毋但一張。

我講伊的老師可能專業精神不足，才予學生遮爾「散仙」；伊講無啦，有的同學足拍拚，毋但佮老師學寫字，也學篆刻。

我問伊練字用墨盤無？伊講無遐爾工夫，墨汁倒佇白色的豆油碟仔爾爾。……

最後，我講不管啦，我欲送你墨盤。伊講千萬毋通，佇書法教室，兩組人公家用兩塊墨盤，嘛是用墨汁。「過一段時間，墨盤積一層焦去的宿墨，同學愛輪流提轉去洗。」

聽起來和我仝款，毋是有需要用墨盤的人。我學書法的時，一時感覺「工欲善其事，必先利其器」，想講「器」若講究，我就會當寫好字，特別央朋友替我採購齊全的一組墨盤、墨和印色；結果繼續貧惰，猶是用墨汁和白色的碟仔。不過，彼个碟仔有淡薄仔講究，分兩爿，若太極圖，是一遍看畫展的時買的。

所以，若送伊墨盤，大大有可能和我仝款，變做假影有水準的妝娗＊。

我無奈，共伊講笑，「我也袂當送你璇石手指。」

伊講：「我這一世人指頭仔、頷頸攏空空，無愛掛有的無的。」

我講，「物質欲望低的人真討厭呢。」

真的，這種人予誠意欲送伊佮意的物件的人，足為難啊。♣

＊

䆀（bái）：醜，差

干焦（kan-na）：只有

妝娗（tsng-thānn）：裝飾品

《人間福報》是一份多元化的報紙，強調內容溫馨、健康、益智、環保，不八卦、不加料、不阿諛，希冀藉由優質的內涵，體貼大眾身心靈的需要，是一份承擔社會責任的報紙。

- 支持福報，做別人生命中的貴人 -

前往支持

加人間福報LINE好友